Las comunas d'Occitània, segonda edicion (2022)

Occitània, qu'es aquò? Quatre ans après, una reedicion es necessària. De fusions de comunas, i n'agèt. Mas tanben la presa de consciéncia per l'autor d'una "Occitània larga" qu'anèsse mai luènh qu'un limit linguistic a un moment donat.

"Es clar que la delimitacion linguistica d’Occitània fa problèma: los estudis que permetèron de la bastir son pas totes de la meteissa qualitat, nimai dins la meteissa temporalitat. Es malaisit de saupre las recuoladas (nimai las avançadas) de la lenga dins l’istòria. Un agach sus las frontièras de las entitats istoricas que compausan Occitània permet de propausar l’inclusion d’autres territòris. Las edicions venentas d’aquel libre espandiràn mai al nòrd aquela largor: Peitau, Anjau, Berric, Barbonés..."

Lo libre de Joan Francés BLANC. Las comunas d'Occitània (2a edicion), es paregut dins la colleccion Esbrigalhs. Coma totas las publicacions de las Edicions Talvera, es disponible a res-non-còst.